Informaziuns

Iscrizuns ai proiec

Iscriziun

L’iscriziun a un di programs por les vacanzes da d’isté organisá dal Sorvisc ai Jogn Val Badia pó ma gní fata online sön le sit www.proiec.org.

Da atira pól gní ajorné i dac dl account dl ann passé o fat n account nü, da pert dl autorisé al’educaziun o dal partezipant sce al á arjunt i 18 agn. Sce valgügn adora aiüt, pól passé te ofize dl Sorvisc ai Jogn Val Badia a Picolin o telefoné tratan i orars d’ofize.

Pröma fasa dles iscriziuns

Dal lönesc, 19 d'aurí 2021, dales 20:00: 1a - 4a classa elementara
Dal mertesc, 20 d'aurí 2021, dales 20:00: dala 5
a

Anter la domënia, ai 25 d’aurí 2021, dales 24:00 mëssel gní arjunt le numer minim de partezipanc, scenó vëgn l’ativité spostada o desdita.

OCIO: Pro i proiec “Isté deboriada”,  “Cool summer” y “My summer” él te chësta fasa ma la poscibilité da scrí ite le partezipant a döes edemes definitives (tan inant che al é lerch).
Pro les atres edemes rovará le partezipant te n pröm momënt sön la lista d’aspeta y ciafará na conferma, tan inant che al é lerch, ai 26-27 d’aurí 2021.

Secunda fasa dles iscriziuns

Les iscriziuns ai proiec pó gní fates anter le mercui, 12 dis dan le scomenciamënt dl’ativité, tan inant che al é lerch.

Mituns cun debojëgns particolars

Por podëi garantí na buna integraziun di mituns cun debojëgns particolars, gnarál metü a desposiziun n animadú implü tl grup. Por podëi assiguré n bun acompagnamënt, periunse i geniturs di mituns cun debojëgns particolars da i scrí ite anter i 25.04.21. Sce l’iscriziun vëgn fata do chësta data, ne pó l’acompagnamënt individual nia plü gní garantí.

Numer limité de partezipanc

Por motifs de organisaziun, vëgnel dé dant n numer minim de partezipanc, indiché pro vigni proiet. Les iscriziuns é por motifs de organisaziun obliëntes y ares ne pó nia gní modificades.

Contribut d’iscriziun

Do avëi fat l’iscriziun sön la plata internet www.proiec.org vëgnel mené, sön la misciun e-mail dada dant, le cunt cun i dac por le paiamënt.

IMPORTANT: por les iscriziuns fates tla pröma fasa (dai 19 ai 25 d'aurí 2021), gnará le cunt mené ai 28-29 d'aurí 2021.

Le paiamënt mëss gní fat anter 5 dis de calënder do la data dl cunt, scenó vëgn l’iscriziun anulada. Sce le paiamënt vëgn fat regolarmënter y la prenotaziun é definitiva, vëgnel mené na e-mail de conferma.

Cunt bancar

Le paiamënt pó ma gní fat sön nosc cunt dla CASSA RAIFFEISEN, don dant la motivaziun indicada sön le cunt!
Sorvisc ai Jogn Val Badia
Cassa Raiffeisen Val Badia - Filiala da San Martin de Tor
IBAN: IT 22 F 08010 58830 000304010353

Lista d’aspeta

Sce al é pro n program bele gnü arjunt le numer mascim de partezipanc, él la poscibilité da se lascé mëte sön na lista d’aspeta. Chësc vëgn aconsié por podëi eventualmënter reagí y mëter lapró edemes, sce al é poscibl por l’organisaziun.
Sce n partezipant ess da tomé fora, ti gnarál comuniché al pröm dla lista d’aspeta y chësc pó regolarisé l’iscriziun, fajon le paiamënt.

Anulé l'iscriziun y retüda contribut d'iscriziun

Do che l’iscriziun é gnüda fata y le contribut é gnü paié ite, n’él por rajuns de organisaziun nia plü meso da anulé l’iscriziun y/o da ciafé zoruch le contribut de partezipaziun. Ma tl caje de maratia gnará le contribut de partezipaziun retü deplëgn, tan inant che al vëgn presenté n zertificat dl dotur.

Privacy

Cun l’iscriziun vëgnel conzedü le consëns al tratamënt di dac personai tla cornisc dla gestiun di programs a öna cun les normes varëntes sön la proteziun di dac aladó dl art. 13 dl’Uniun Europeica 2016/679. Privacy

Assiguraziun

Tratan la desfirada di programs é i mituns assigurá por responsabilité zivila, dit plü avisa por danns cuntra terc (Haftpflichtversicherung) cina a n import de 5.000.000€. Al n’é nia preodü na assiguraziun sce zacai se fej me (Unfallversicherung). Sce Os Ves dejidrasse chësta assiguraziun, Ves periunse da la stlü jö privatamënter.

Covid-19:

Les ativités programades pó mudé cina dan le mëteman, aladô dles mosöres de segurëza scrites dant dala Provinzia o dal Stat.
Sce n’ativité mëss por rajuns dl COVID-19 gní mudada daldöt y ara ne respidlëia en general nia plü ci che vëgn pité al momënt dl’iscriziun, á le partezipant la poscibilité da desdí süa partezipaziun tl momënt ch’al vëgn comuniché le program definitif. Te chësc caje vëgnel retü le contribut d’iscriziun.
A vigni moda vëgn le contribut d’iscriziun retü sce l’ativité vëgn desdita da pert dl’organisaziun.

Cun l’iscriziun a un di proiec #isté21 se detlarëia le partezipant a öna da tigní ite les normes en cunt dl’igiena y dla sanité, metüdes dant dales autorités competëntes o dal’organisaziun al momënt dl’esecuziun dl’ativité, sciöche p.ej. tigní sö le mascherot, tigní ite destanzes, fá n test asvelt o PCR y.i.i.