"My Summer" é le proiet da d'isté che ti baia ados a düc i jogn dala 3a classa dla scora mesana ala 2a classa dla scora alta. Ince en chësc ann pitunse ativités y edemes desvalies, por che i jogn ais la poscibilité da passé n bel iste adöm cun sü compagns. I orun ti dé na gran lerch ala creativité, al movimënt y al imparé val'de nü. N gran fin é che düc i jogn se stais saurí te nüsc proiec, che ai ne sëntes nia presciuns da mëssei ester mius co d'atri, mo che ai pois ester insciö sciöche ai é cun sües capazités y abilités individuales. Te na atmosfera de respet y azetanza, pó le jonn fá esperiënzes ütles y se svilupé te na manira sana. Tratan les edemes de proiet vëgn i partezipanc acompagná da personal pedagogich istruí.
Por i geniturs che scrí ite mituns cun debojëgns particolars (fisics, psichics, soziai o ater), lasciunse alsavëi che al gnará fat na incuntada o telefonada dan le proiet por imparé a conësce miú le möt y sües esigënzes. Insciö podunse integré al miú i partezipanc y ti dé le sostëgn che ai adora.
IMPORTANT: Tla pröma fasa d'iscriziun (dai 24 de forá ai 1 de merz) él ma la poscibilité da scrí ite definitivamënter le partezipant a öna na edema (tan inant che al é lerch). Pro les atres edemes rovará le partezipant te n pröm momënt sön lista d'aspeta (poscibilité da dé dant le degré de priorité); al ciafará spo na conferma, tan inant che al é lerch, ai 9-11 de merz.
Sce al é pro n program bele gnü arjunt le numer mascim de partezipanc, él la poscibilité da se lascé mëte sön lista d'aspeta. Chësc vëgn aconsié por podëi eventualmënter reagí y injunté edemes, tan inant che al é poscibl por l'organisaziun.
Por che l'ativité pois gní fata, mëssel gní arjunt le numer minim de 8 partezipanc.
Implü orunse ti mët a cör a düc i geniturs da ti dé para ai mituns na marëna por les ativités che döra cina tl domisdé.
Porsona de contat: Vanessa Obwegs (vanessa@jogn.org , 345 3717729)