Survival week in the Dolomites

Sciöche te pos bele te ponsé dal titul, sará chësta na edema plëna de aventöra. I piun ia cun le rucsoch sön le spiné y na gran orenté da jí a pe. Düc i dis te chësta edema passarunse te nostes beliscimes Dolomites, olache tö descuriaras n valgügn posć nüs. Te ne impararas nia ma val’ de nü sön la natöra y i crëps, mo dantadöt ince de te instës y dl vire tla natöra zënza fonin o d’atri aparac tecnics. T’odaras che vigni rama y vigni fëia pó t’ester d’öga, mo dantadöt ince tan important che le laur de grup y le tigní adöm é. Suranöt starunse te üties, olache i passarun de beles ores en compagnia pro val’ jüch. Porchël... ci che t’adores é de bugn cialzá, vëia da passé dis tla natöra en compagnia, sambëgn cun val’ matada y na bela hez. I t’aspetun!

Important: Pro le proiet “Cool summer” él tla pröma fasa (dai 11 ai 17 de merz 2019) ma la poscibilité da scrí ite le partezipant a döes edemes definitives (tan inant che al é lerch). Por les atres edemes rovará le partezipant te n pröm momënt sön la lista d’aspeta y ciafará na conferma, tan inant che al é lerch, ai 18-19 de merz.