AHA!

Descriziun

“AHA, sëgn ái capí!” avisa chësta sará tüa reaziun tratan chësc proiet de esperimënc. Ne t’aste mai damané ci che n scienzié fej? Aste n iade ponsé do, da olache döt nosc savëi vëgn?

Ci adora pa na planta por suravire? Ciodí se scialda pa le monn? Ciodí verd pa na ciandëra? Ciodí é pa le cil bröm? Tratan chësta edema chiriunse respostes a chëstes y a tröpes d’atres domandes fora dl ciamp dla chimica, fisica y biologia. Gonot capëscion les cosses impormó canche an les á odüdes y porvades fora instësc, porchël nes tolarunse le tëmp da ponsé do, da fá domandes, da ciaré avisa y da porvé fora n gröm de nü. Te impararas da lauré te laboratore, da mëte a jí esperimënc, da documenté i resultac y te podaras insciö amplié to savëi.

N bun scienzié adora interes, motivaziun y tröpa creativité, porchël t’aspetunse ma plü te. Fá ince tö pert de nosc team de scienziá!